Perchennog campfa a swyddog drysau yn cael eu dedfrydu am gynllwyn i gyflenwi steroidau

Mae perchennog campfa a swyddog drysau a ddefnyddiodd unedau hunanstorio yn y Rhyl i storio llawer iawn o steroidau wedi cael eu dedfrydu yn Llys y Goron yr Wyddgrug am gynllwyn i gyflenwi cyffuriau dosbarth C.

Cafodd Lee Ablitt, 50 oed, o ardal Warrington, ei stopio tra oedd yn gyrru ar yr M56 am ei fod yn yrrwr wedi’i wahardd. Wrth i'r heddlu chwilio’r cerbyd, daethant o hyd i nifer o focsys o gyffuriau dosbarth C.

Arweiniodd ymholiadau’r heddlu at ddau gynhwysydd storio yn y Rhyl, wedi’u cofrestru i Ablitt, lle daethpwyd o hyd i swmp sylweddol o steroidau a chyffuriau gwella perfformiad ynghyd â llawer iawn o arian.

Datgelodd data a gasglwyd o ffôn Ablitt fod Christopher Thompson, 49, o Wigan, hefyd yn ymwneud â’r fenter droseddol, gyda Thompson yn anfon rhestrau o gyffuriau yr oedd cwsmeriaid yn gofyn amdanynt at Ablitt.

Dywedodd arbenigwr cyffuriau’r heddlu fod y cyffuriau a gafodd eu hatafaelu yn werth rhwng £1.5m a £2.1m.

Dywedodd Ablitt ei fod wedi dechrau corfflunio pan oedd yn ei arddegau a’i fod wedi dechrau swmpbrynu steroidau - ar y cyd ag eraill i ledaenu’r gost - a’u bod wedyn yn cael eu cyflenwi ar gais.

Dywedodd Emmalyne Downing o Wasanaeth Erlyn y Goron: “Roedd yn amlwg o’r dystiolaeth fod y ddau ddyn wedi bod yn rhan o’r fenter droseddol hon.

“Efallai na fydd rhai’n meddwl bod y cyffuriau hyn yn beryglus, ond maen nhw’n sylweddau a reolir sy’n gallu bod yn niweidiol.

“Cyflwynodd Gwasanaeth Erlyn y Goron achos cryf a arweiniodd yn y pen draw at bledio’n euog, gan ddwyn y troseddwyr gerbron y llys.”

Ar 14 Tachwedd 2024 cafodd Lee Ablitt ei ddedfrydu i bum mlynedd o garchar a chafodd Christopher Thompson ei ddedfrydu i  ddwy flynedd a naw mis o garchar.