Deliwr cyffuriau o Gasnewydd yn cael ei ddedfrydu i garchar am oes am lofruddiaeth

Mae dyn a oedd yn delio cyffuriau ar strydoedd Casnewydd wedi cael ei ddedfrydu am lofruddiaeth ar ôl iddo drywanu dyn arall yn y frest.

Cyfaddefodd David Sisman, 21, yn y Llys y bu’n delio cyffuriau ar 14 Mai 2024 yn ardal y Maendy pan ddaeth Lee Crewe ato.

Estynnodd Sisman gyllell a thrywanu’r dioddefwr unwaith yn ei frest, a oedd yn angheuol.

Yn ystod y treial, honnodd Sisman ei fod wedi gweithredu er mwyn amddiffyn ei hun, ond gwrthododd y rheithgor ei honiad a’i gael yn euog o lofruddiaeth.

Dywedodd David Roberts o Wasanaeth Erlyn y Goron: “Roedd Sisman yn delio cyffuriau ar y stryd yng ngolau dydd, a phenderfynodd gario cyllell.

“Roedd yn rhaid i Wasanaeth Erlyn y Goron brofi nad oedd Sisman yn gweithredu’n gyfreithlon er mwyn amddiffyn ei hun, ac roedd y dystiolaeth a roddwyd gerbron y rheithgor wedi arwain at ei gael yn euog o lofruddiaeth.

“Mae’r achos hwn yn dangos pa mor beryglus y gall cario cyllyll yn gyhoeddus fod.

“Mae teulu a ffrindiau Lee Crewe wedi dioddef colled enfawr, a byddwn yn dal i feddwl amdanynt.”

Dedfrydwyd David Sisman i garchar am oes yn Llys y Goron Casnewydd ar 28 Tachwedd 2024, a gorchmynnwyd iddo wasanaethu am o leiaf 24 o flynyddoedd.