llys ynadon: gwrandawiadau pledio
Mewn gwrandawiad pledio, bydd clerc y llys yn darllen y rhestr o droseddau y cyhuddwyd y diffynnydd ohonynt ac yn gofyn i’r diffynnydd bledio’n ‘euog’ neu’n ‘ddieuog’.
Os yw’r achos yn barod, gellir gwneud hyn yn y gwrandawiad cyntaf yn y llys ynadon. Os nad yw’r achos yn barod, bydd y Barnwr Rhanbarth neu’r ynadon yn trefnu gwrandawiad pledio ar wahân er mwyn i hyn ddigwydd.
Os yw’r diffynnydd yn pledio’n ‘euog’ i’r cyhuddiadau i gyd, gall y barnwr rhanbarth neu’r ynadon ddedfrydu’r diffynnydd ar unwaith neu gallant anfon yr achos i Lys y Goron os ydynt yn credu bod y diffynnydd yn haeddu dedfryd hirach nag y mae ganddynt y pŵer i’w rhoi. Gallant hefyd ohirio’r gwrandawiad dedfrydu i ofyn am fwy o wybodaeth i'w helpu i benderfynu beth ddylai'r ddedfryd fod.
Gall hyn gynnwys adroddiad ‘cyn-dedfrydu’, a ysgrifennir gan y gwasanaeth prawf, sy’n darparu asesiad annibynnol o’r troseddwr a’r risgiau a berir ganddo.
Byddwn hefyd yn rhoi eich ‘Datganiad Personol Dioddefwr’ i’r llys os ydych wedi darparu un. Bydd yr heddlu’n gofyn i chi a hoffech chi ddarparu un yn ystod yr ymchwiliad – dyma eich cyfle chi i egluro sut mae’r drosedd wedi effeithio arnoch chi.
Os hoffech ddarllen eich ‘Datganiad Personol Dioddefwr’ yn uchel i’r llys, yna gallwn wneud cais i’r llys i chi gael gwneud hyn. Fel arall, gall yr erlynydd ei ddarllen yn uchel neu bydd y Barnwr Rhanbarth neu’r ynadon yn ei ddarllen drostynt eu hunain.
Yna bydd y Barnwr Rhanbarth neu’r ynadon yn defnyddio’r wybodaeth honno i benderfynu pa ddedfryd y bydd y diffynnydd yn ei derbyn yn unol â’r canllawiau dedfrydu ar gyfer y drosedd y mae wedi’i gael yn euog ohoni.
Pennir canllawiau dedfrydu gan y Cyngor Dedfrydu yn unol â chyfraith y DU.
Os bydd y diffynnydd yn pledio’n ‘euog’ i rai o’r cyhuddiadau ond yn ‘ddieuog’ i eraill, bydd yn rhaid i erlynydd Gwasanaeth Erlyn y Goron benderfynu a ddylid derbyn y pleon ‘euog’ ai peidio.
Mae angen iddynt hefyd benderfynu pa gamau i’w cymryd yng nghyswllt y cyhuddiadau y mae’r diffynnydd wedi pledio’n ‘ddieuog’ iddynt.
Mae gan yr erlynydd ddau opsiwn:
- Gallant naill ai ‘gynnig dim tystiolaeth’ ar gyfer y cyhuddiadau y mae’r diffynnydd wedi pledio’n ‘ddieuog’ iddynt. . Os na fyddwn yn cynnig unrhyw dystiolaeth, mae hyn yn golygu bod y llys yn cofnodi rheithfarn ‘dieuog’ ar gyfer y cyhuddiadau hynny ac ni allwn gymryd camau pellach yn eu cylch. Bydd y Barnwr Rhanbarth neu’r ynadon wedyn yn dedfrydu’r diffynnydd am y cyhuddiadau y mae’r diffynnydd wedi pledio ‘euog’ iddynt yn unig.
Neu
- Gall ofyn i’r cyhuddiadau y mae’r diffynnydd wedi pledio’n ‘ddieuog’ iddynt gael eu rhestru ar gyfer treial. Ni fydd y diffynnydd yn cael ei ddedfrydu am unrhyw gyhuddiadau hyd nes y bydd y treial wedi’i gynnal.
I wneud y penderfyniad hwn, mae’n rhaid i’r erlynydd ystyried nifer o ffactorau sydd wedi’u nodi yn y Cod ar gyfer Erlynwyr y Goron a chanllawiau’r Twrnai Cyffredinol ar dderbyn pleon.
Mae hyn yn cynnwys a fyddai’r llys yn gallu rhoi dedfryd i’r diffynnydd sy’n adlewyrchu difrifoldeb y troseddau yr ydym wedi cyhuddo’r diffynnydd ohonynt. Er enghraifft, pe bai diffynnydd yn pledio’n ‘euog’ i drosedd fwy dibwys fel dwyn ond yn ‘ddieuog’ i drosedd fwy difrifol fel trais rhywiol, yna ni fyddai’r ddedfryd y gallai’r llys ei rhoi iddo yn adlewyrchu difrifoldeb y troseddau y bu i ni ei gyhuddo ohonynt. Os nad ydym yn credu y byddai’r llys yn gallu rhoi dedfryd briodol i’r diffynnydd, yna byddwn yn gofyn i’r cyhuddiadau sy’n weddill gael eu rhestru ar gyfer treial.
Lle bo’n bosibl, byddwn yn ystyried eich barn chi fel dioddefwr er mwyn ein helpu i benderfynu a yw er budd y cyhoedd i dderbyn y ple.
Os yw’r diffynnydd yn pledio’n ‘ddieuog’ i’r holl gyhuddiadau, bydd y barnwr yn pennu dyddiad ar gyfer y treial.
