Dyn yn cael ei garcharu am ymosod yn rhywiol ar fenyw yn ei chartref ei hun

Aeth Benjamin Guiver, 35 oed, i mewn i’r eiddo yn hwyr yn y nos lle’r oedd y fenyw wedi syrthio i gysgu yn yr ystafell fyw. Deffrodd i weld Guiver yn yr ystafell a rhedodd allan o’r eiddo mewn braw.

Dilynodd Guiver hi, gafaelodd yn ei gwallt a’i dyrnu, ac wedyn tarodd ei hwyneb ar y llawr. Ar ôl llusgo’r ddynes yn ôl i’r tŷ gerfydd ei gwallt, ymosododd Guiver arni’n rhywiol.

Yna, cyrhaeddodd perthynas gwrywaidd i’r ddynes a hel Guiver allan o’r tŷ ond dyma Guiver yn ymosod arno ef hefyd drwy ei ddyrnu a’i dagu, cyn i’r heddlu gyrraedd.

Dywedodd Jessie Walling o Wasanaeth Erlyn y Goron: “Roedd y trais corfforol a rhywiol a ddioddefwyd gan y fenyw dan law dieithryn llwyr yn ei chartref ei hun yn erchyll.

“Roedd y dystiolaeth gadarn a gyflwynwyd gan Wasanaeth Erlyn y Goron wedi golygu bod y dyn wedi pledio’n euog i droseddau difrifol iawn. Mae’r ddau a ddioddefodd yr ymosodiadau wedi bod yn ddewr iawn, a gobeithio y byddan nhw’n cael rhywfaint o gysur o weld y troseddwr hwn yn cael ei ddwyn gerbron y llys am ei droseddau dychrynllyd.”

Cafodd Benjamin Guiver ei ddedfrydu i 20 mlynedd o garchar yn Llys y Goron Abertawe ar 31 Hydref 2024, gyda’r 5 mlynedd diwethaf i’w gyflwyno ar drwydded.  Cafodd Guiver orchymyn atal hefyd.